«Гашыйклар тавы» призлы урыннар яулый

Үзәк Азия һәм төрки дөнья илләре конкурсында хатын-кыз ролен иң яхшы башкарган өчен призны Татарстанның «Гашыйклар тавы» фильмында уйнаган актриса Эльза Кәримова алды. Бу яшь пар Сәид белән Ясминәнең мәхәббәт тарихы, алар үзләре өчен символик кайгыда, бер-берсенә мәңгелек мәхәббәт турында ант иткәннәр, әмма язмыш аларны озак елларга аерган. Яшь актриса яшь Ясминә ролен башкарды.

«Евразия» кинофестивалендә атна дәвамында тамашачылар 30 дан артык фильм караган, шуларның 22 се конкурс программаларында катнашкан.

Фестивальнең гамәлгә куючы һәм оештыручысы – Казахстан Республикасы Мәдәният һәм мәгълүмат министрлыгы. Кинофестивальне турыдан-туры оештыру Шәкен Айманов исемендәге «Казахфильм» милли киностудиясенә ышанып тапшырылган.

Фильмның режиссеры Салават Юзеев призны үзе Алматы шәһәрендә алды. Әлеге уңайдан уй-хисләрен белдерде:«Фестиваль көчле конкурс программасы җыйды. Анда шәп фильмнар катнашты, аларның күбесе инде дәрәҗәле халыкара фестивальләрдә тәкъдим ителгән. Мәсәлән, Каннада махсус призны яулаган төрек эше бар иде. Үзбәк фильмы Korkut Ata Film Festival кинофестивалендә җиңде. Таҗикстаннан Oskarга тәкъдим ителгән иран-таҗик фильмы катнашты. Шунысы куандыра: мондый көндәшләр арасында безнең фильм танылу алды. Әмма иң мөһиме-фильмны күрсәтүдә халык күп булуы сөендерә. Зал тулы иде. Алматыда яшәүче татарлар шактый күп килде. Күрсәтүдән соң озак вакыт аерылыша алмадылар һәм җирле диаспора мине икенче көнне очрашуга чакырды. Картинаны шулай ук кино тәнкыйтьчеләре дә игътибарсыз калдырмады, алар арасында Европадан да, Азиядән дә вәкилләр күп иде».

 Исегезгә төшерәбез, «Гашыйклар тавы» тулы метражлы нәфис фильмының премьерасы XX Казан халыкара «Алтын мөнбәр» кинофестиваленең конкурсында катнашты. Фильм «Иң яхшы режиссер» һәм «Иң яхшы сценарист» номинацияләрендә җиңүче булды. Картинаның генераль продюсеры Миләүшә Айтуганова кастингны актер һәм режиссер Ирек Хафизовка ышанып тапшырган, һәм ул ялгышмаган. Ә кинофильмны кинотеатрларда тиздән, февральдә үк карарга мөмкин булачак, дип хәбәр итәләр “Татаркино”дан.

Фото авторы:  Рафат Бегишев