«Апуш» театр студиясенең кастингына 120 дән артык гариза килгән

Яңа шәкертләрне студиянең өч филиалына җыялар: «Мәскәү» мәдәният үзәге, Сәетгалиев ис.мәдәният йорты һәм «Апуш.Нәниләр» мәктәп-студиясе. 

«Апуш» студиясе шөгыльләнүчеләр өчен яңа мөмкинлекләр ача: Камал театры сәхнәсендә чыгыш ясау, гастрольләргә чыгу, фестивальләрдә катнашу дисеңме. Беренче һөнәри тәҗрибә алу, үз-үзеңә ышанычны арттыру, театр сәнгате белән якыннан танышу өчен дә студиядә барлык шартлар тудырылып килә. Быелгы сезонда, ким дигәндә, дүрт спектакльнең гастрольләре планлаштырыла, алар арасында «Апуш.Нәниләр»нең «Тыз-быз»ы да бар. 

Жюри составында студиянең остазлары булачак. Сайлап алуда катнашучы балалардан иҗади сәләтләрен күрсәтү сорала: җырлау, шигырь сөйләү, бию яки музыка уен коралында уйнау, шулай ук өстәмә биремнәргә әзер булу да кирәк.