Федераль исемлеккә 104 яңа дәреслек кертелде

Яңа уку әсбапларының күпчелеге – 67 се туган телләргә, шул исәптән башкорт, коми-пермяк, татар, удмурт һәм чечен телләренә багышланган. Шулай ук туган әдәбият һәм туган телләрдә әдәби уку буенча уку әсбаплары өстәлде, шул исәптән карачай, нугай, черкес һәм удмурт телләрендә. Шулай ук белем бирү программасының вариатив өлеше өчен уку әсбаплары, мәсәлән, сәнгать, медиаграмоталылык, химия нигезләре һәм профориентация буенча уку әсбаплары кертелде. 

Дәреслекләр экспертизага 2024 елның 31 июленнән 31 августына кадәр кабул ителде. Узган ел башыннан РФ субъектларының төбәк һәм этномәдәни үзенчәлекләрен исәпкә алуны, гражданнарның РФ халыклары телләреннән туган телдә белем алу хокукын гамәлгә ашыруны, РФ халыклары телләреннән туган телне һәм Россия халыклары әдәбиятын туган телдә өйрәнүне тәэмин итүче дәреслекләрне җибәрү срогы чикләнми. Бу Россия Мәгариф министрлыгының 2024 елның 22 гыйнварындагы 28 номерлы боерыгыннан күренә. Үзгәреш дәреслекләрнең күрсәтелгән категориясе дәреслекләренең федераль исемлегенә кертү мөмкинлекләрен киңәйтте.

Фото: ТР Мәгариф һәм фән министрлыгы сайты