«Планетада дежурный» сменасы тәмамлана

9–16 октябрьдә Татарстан Республикасы «Планетада дежурный» Бөтенроссия космик сменасын кабул итте. Ул Россия Федерациясе Фән һәм югары белем министрлыгы тарафыннан «Космос өчен кадрлар» федераль проекты кысаларында, Инновацияләргә ярдәм фонды, «Роскосмос» дәүләт корпорациясе һәм «Талант һәм уңыш» мәгариф фонды ярдәме белән оештырылды.

Сменада космик технологияләр юнәлешләре буенча илнең 40 төбәгеннән килгән 12–18 яшьлек 100 дән артык мәктәп укучысы катнашты. Катнашучылар Россиянең әйдәп баручы югары уку йортлары, фәнни оешмалары һәм технологик компанияләре белгечләре җитәкчелегендә гамәли мәсьәләләр өстендә эшләде. Космик робототехника, иярченнәр ярдәмендә мониторинг үткәрү, ясалма фәһем һәм инженерлык системаларын эшләү юнәлешләрендә проектлар әзерләде.

Бүген Бөтенроссия космик сменасына йомгак ясалачак. Финалга чыгучылар эш нәтиҗәләрен белгечләргә тәкъдим итәчәк. Фото - нейрочелтәр.