Миләүшә Хәйруллина яңа программа тәкъдим итә

Миләүшә Хәйруллина  –  заманның иң якты һәм үзенчәлекле композиторларының берсе. Аның күпкырлы таланты төрле жанрларда чагыла: опера-симфоник әсәрләрдән алып инструменталь миниатюраларга, театр музыкасына һәм вокаль лирикага кадәр.

Казанда узачак концертта Татарстан Республикасының әйдәп баручы солистлары һәм коллективлары – Дәүләт академия симфоник оркестры (сәнгать җитәкчесе һәм баш дирижер Александр Сладковский), Дәүләт камера хоры (сәнгать җитәкчесе Миләүшә Тәминдарова) композиторның әсәрләрен башкарачак. Концертта Татарстанның атказанган артистлары Артур Исламов, Эльза Исламова, шулай ук халыкара конкурслар лауреатлары Любовь Добрынина, Ильяс Камал, Ильяс Фәрхуллин һәм Айдар Абдрахимов катнаша.

Дирижер пульты артында – Лондондагы Король көллиятен һәм П.И. Чайковский исемендәге Мәскәү дәүләт консерваториясен тәмамлаган – Джереми Уолкер. Уолкерның дирижер буларак дебюты – «West Side Story».  Ул Вена опера академиясендә стажировка үтә һәм төрле коллективлар белән эшли: Late Night Opera, Helios Opera, Лондонның Король көллиятенең Симфоник оркестры, Россиянең әйдәп баручы оркестрлары.

Концерт программасында:

 – «Шагыйрь» хор һәм оркестр өчен татар шагыйрьләренең шигырьләренә язылган поэма;

 – «Кави-Сәрвәр» операсыннан фрагментлар;

  – «Анам кыры» – Чыңгыз Айтматовның повесте буенча куелган спектакль музыкасыннан сюита;

 –  «Доктор Живаго» – хор һәм оркестр өчен Борис Пастернак романы буенча роман-поэма.

 –  Яз мине илһамландыра... Якты дөньяга да мин яз иртәсендә туганмын. Бигрәк тә март ае минем күңелемә якын, һәр ел саен яңа тормыш башланган төсле. Иҗатчы ул киптергеч кәгазе кебек: бөтен нәрсәне үзенә сеңдереп бара. Һәр нәрсәгә нечкәләп, башкача карый белә. Һәр чорның чишелмәгән проблемалары хәттин ашкан. Халыкларны, илләрне берләштерә торган, һәр кешене борчый торган андый темаларны күтәреп, җавап табарга омтылу сәнгатькәр өчен һәр дәвердә дә мөһим, – ди үзе композитор.