Яңа ел чаралары программасы билгеле

Елдагыча «Казан» гаилә үзәге Яңа ел чараларын уздыруының төп мәйдәнчыгы булып торачак. Биредәге төп чыршы 24 декабрь 18:00 сәгатьтә ачылачак. Чаралар «Ак елан» риваяте нигезендә үткәреләчәк.

Төп чыршы ачылышына кадәр шәһәр халкын һәм кунакларын 17:30 сәгатьтә «Фестивальный» бульварында Яңа ел дефилесында катнашырга чакыралар.

– Без фестиваль бульварыннан «Казан»гаилә үзәгенә кадәр дефиле узачакбыз. Бер теләк: катнашучылар ак төстәге киемнән һәм үзләре ясаган ак чыршы уенчыклары белән килсеннәр, — дип аңлатты Азат Абзалов.

Чыршы шәһәрчекләре Казанның барлык районнарында да ачылачак. Кайберләре белән түбәндә таныша аласыз:

 – Иске Татар бистәсендәге чыршы шәһәрчеге үзенең утларын 20 декабрь 15:45 сәгатьтә кабызачак;

 – Г.Тукай исемендәге дәүләт филармониясе каршындагы сквер чыршысы 20 декабрь 16:00 сәгатьтә ачылачак;

 – «Калейдоскоп» паркында 23 декабрь 16:00 сәгатьтә тантаналы ачылыш көтелә;

 – Дәрвишләр бистәсендә бәйрәм программасы 21 декабрь 16:00 сәгатьтә узачак.

Чыршы шәһәрчекләре 22:00 сәгатькә кадәр эшләячәк. Ә Яңа ел төнендә алар иртәнге өчкә кадәр ачык булачак.

Автор фотосы