Балаларга киберкуркынычсызлык турында сөйләячәкләр

07 апрель 2026 Мәгариф

Балалар өчен киберянаулар темасына ике яңа видеоролик тәкъдим ителде. Оештыручылар – «Цифрлы икътисад» автоном коммерциягә карамаган оешманың «Цифрлы ликбез» проекты, РФ Мәгариф министрлыгы һәм РФ Цифрлы үсеш, элемтә һәм массакүләм коммуникацияләр министрлыгы, Касперский лабораториясе.

Беренче ролик «акыллы йорт» системаларын саклау һәм цифрлы технологияләр ярдәмендә йорт хайваннарын яклау ысулларын аңлата. Ә икенче видео кулланучыларны киберкуркынычсызлык буенча ялган киңәшләрне чын мәгълүматтан аерырга өйрәтә. Барлык материаллар да цифройликбез.рф платформасында урнаштырылган. Проект «Мәгълүматлар икътисады» милли проекты кысаларында тормышка ашырыла.

Видеороликтагы вакыйгалар уйлап чыгарылган Оушен-Сити шәһәрендә бара. Сюжет үзәгендә – яшь журналист-балык Лина. Беренче чыгарылышта ул компьютер уеннарында уйнаучы-сигезаяк Леликка ярдәм итә: аның «акыллы» җайланмаларына һөҗүм ясала, ә йорт хайваны әкәм-төкәм Пузырик югала. Санлы эзләү билгесе ярдәмендә хайван табыла, ә герой йорт иминлеген ныгыту юлларына төшенә.

Икенче видеода интернетта таралган «зарарлы киңәшләр» проблемасы күтәрелә. Ташбака-мәктәп укучысы Паша ялган киңәшләргә ышанып, программаларны яңартудан баш тарта һәм нәтиҗәдә кыенлыклар белән очраша. Бу очрак буенча Лина тикшерү үткәрә һәм Пашага дөрес киберкуркынычсызлык кагыйдәләрен аңлата.

Видеолар 6 яшьтән өлкәнрәк балаларга юнәлтелгән. Аларны ата-аналар һәм укытучылар белән бергә карарга киңәш ителә. Укытучылар өчен махсус методик материаллар да әзерләнгән.

Фото: цифройликбез.рф сайты