Казанда инклюзив белем бирү буенча халыкара форум уза

Быел форум В.Г. Тимирясов исемендәге Казан инновацион университетының 30 еллыгына багышлана, дип хәбәр итә ТР Мәгариф һәм фән министрлыгы.

Оештыру комитеты рәистәшләре: Татарстан Республикасы Мәгариф һәм фән министры Илсур Һадиуллин, КИУ ректоры, Татарстан Республикасы Иҗтимагый палатасы Рәисе урынбасары, «Белем» Россия җәмгыятенең Татарстан бүлеге җитәкчесе Асия Тимирясова. Программа комитеты рәисе булып КИУның өзлексез белем бирү буенча проректоры, педагогик инновацияләр һәм инклюзив белем бирү фәнни-тикшеренү институты директоры, профессор Дания Әхмәтова чыгыш ясады.

Проректор балаларның ялын оештыруны, җәйге инклюзив лагерьларны, тәрбия буенча киңәшчеләрнең эшен, мигрантларны адаптацияләүне, шулай ук МХОда катнашучыларны һәм аларның балаларын укыту, тәрбияләү һәм реабилитацияләүне дә кертеп, тикшерелә торган мәсьәләләрнең киң спектрын билгеләп үтте.

Быелгы форум дүрт көн дәвам итәчәк, ә ул пленар утырыштан башланып китте, анда хакимият вәкилләре, мәгариф оешмалары җитәкчеләре, педагоглар һәм студентлар үз сәламнәрен җиткерде.

Фото: ТР Мәгариф һәм фән министрлыгы сайты