Иске Татар бистәсендә Республика һәм шәһәр көнен билгеләп үтәчәкләр

26-29 август көннәрендә  «Печән базары» татар мәдәнияте һәм дизайны фестивале үтәчәк. Быел фестивальнең темасы –  «Татар йорты». Программада –һөнәрчелек остаханәләре, ярминкә һәм музыкаль чыгышлар. 

27 августта «Күптөрлелектә бердәмлек» фестивале көтелә. Биредә кунаклар музыкаль номерлар, һөнәрләр күргәзмәләре аша традицияләр белән таныша алачак. Ә 29 августта бистәдә Мөхәммәд пәйгамбәрнең «Мәүлид ан-Нәби»туган көне узачак. Программада – музыкаль чыгышлар, хәләл-маркет һәм иҗади мастер-класслар.

Шәһәр көнендә, 30 августта, мода күрсәтүләр, тере музыка һәм халык күңел ачулары белән «Милли кием» фестивале узачак. Бәйрәм халык җыр-бию сәнгатен саклауга һәм милләтара сәнгатьне ныгытуга юнәлдерелгән «Казан сөлгесе» фестивалендә дәвам итәчәк.