Журналыбызда өр-яңа рубрика!

04 апреля 2025 Мөршидә КЫЯМОВА

“Нәселем силсиләсе” – “Гаилә һәм мәктәп” журналының өр-яңа рубрикасы. Журналның апрель санында сәхифәнең беренче язмасы дөнья күрәчәк. Биредә данлыклы татар шәхесләренең дәвамчылары үз гаилә тарихлары турында бәян итә. Иң мөһиме, шул гаилә эчендәге мөнәсәбәтләр татар халкының мәкальләре җирлегендә ачыклана, буыннар чылбырының акыл хәзинәсе халык тәгъбирләренә «төреп бирелә». Беренче каһарманыбыз – халык язучысы Нурихан Фәттахның оныгы Зөләйха Камалова.

Зөләйха белән нәсел тамырларын барладык. Язмада яшь язучы әтисе турында да бәян итте:

Әтием – драма артисты Камил Камал. Г.Камал исемендәге Татар дәүләт академия театрында эшләгән. Кызганыч ки, мин әтине хәтерләмим диярлек. Ул миңа әллә дүрт, әллә алты яшь тулганда якты дөньядан китеп барган, хәмергә бирелгән. Әлеге коточкыч чир туксанынчы елларда бик күпләрне әтисез иткән. Бу минем өчен дә исерткечкә каршы мәңгелек прививка булгандыр. Хәмер авыз итеп караганым юк, янымда берәрсенең эчкәненә дә чыдый алмыйм. Тәрбия өчен кемнеңдер нәрсәдер әйтүе дә кирәк түгел, яхшы яки начар үрнәк кенә булып була! Моннан тыш, генетика да бар – әтине белгәннәр минем кайбер якларымны аңа тартым ди, ул курайда уйнаган, шигырьләр язган, җырлаган, нечкә күңелле булган. Үзем дә еш моңланып утырырга яратам.

“Гаилә һәм мәктәп”нең апрель санында “Бабамны Габдулла Тукай дип уйлаганнар” язмасын укырга киңәш итәбез.