Казанда “Сәйяр” фестиваленә йомгак ясалды

04 апреля 2025 Гүзәл ЗАКИРОВА

3 апрельдә Г.Кариев исемендәге Казан татар яшь тамашачылар театрында балалар һәм яшүсмерләрнең “Сәйяр” театр фестиваленең йомгаклау бәйрәме үтте. 27 ел буе яшь артистларны иҗатка рухландырып килгән бу фестивальдә быел 2300 гә якын талантлы бала катнашты. 110 балалар бакчасыннан һәм 78 мәктәптән килгән балалар район һәм шәһәр этапларында үзләренең сәләтләрен күрсәттеләр. Финалга исә 18 балалар бакчасы һәм 26 мәктәп театры үтте. Бу хакта Казан шәһәре Башкарма комитеты Аппаратының Тел культурасы өлкәсендә милли сәясәтне гамәлгә ашыру бүлеге хәбәр итә.

❮ ❯

Казанда “Сәйяр” фестиваленә йомгак ясалды

Фестивальнең төп бүләге – җиңүче коллективка бирелгән грант. Мәктәп коллективлары 1 миллион сум, ә балалар бакчалары 100 мең сум акча оттылар:

Гран-при: “Хәзинә” театр студиясе (2 нче татар гимназиясе) һәм 71 нче балалар бакчасы театр төркеме.

1 нче урын: Казанның Киров районындагы 4 нче гимназия-интернатының “Асылташ” театр коллективы һәм Казан федераль университеты каршындагы Ш.Мәрҗани исемендәге 2 нче гимназия – белем үзәге балалар бакчасы.
2 нче урын: Казанның Идел буе районындагы 18 нче татар гимназиясе “Галәм” театр төркеме һәм Казан шәһәре Идел буе районының 396 нчы балалар бакчасы – үсеш үзәге.
3 нче урын: Казанның Идел буе районындагы 16 нчы татар-инглиз гимназиясенең “Нур” театр коллективы, Казанның Яңа Савин районындагы 117 нче катнаш төрдәге балалар бакчасы, Казанның Авиатөзелеш районындагы 33 нче гимназиясенең “Өмет” театр төркеме һәм Казанның Совет районындагы 50 нче балалар бакчасы.
“Сәйяр” фестивале 1998 елдан башлап Казан шәһәрендә уңышлы проект булып тора. Проект нәтиҗәсендә күп мәктәпләрдә һәм балалар бакчаларында татар театр коллективлары оешты. 2015 елдан башлап фестиваль республика күләмендә үткәрелә. Фестиваль муниципаль һәм республика этапларыннан тора.

Фестивальнең төп максаты – балаларда иҗат аша татар теленә кызыксыну уяту. Балалар рольләр башкарганда, образга кереп, үз фикерләрен сәнгатьле һәм төгәл итеп җиткерергә өйрәнәләр. Бу үз чиратында татар телендә иркен аралашу мохите тудыра. Проектның идея авторы – Зиннур Хөснияр.

Фото: Кирилл Буздалов