18 майда Изге Болгар җыены узачак

Быелгы чараның яңалыгы — җырлар музыкасыз яңгыраячак. Шулай ук хәзрәтләр тарафыннан вәгазьләр башкарылачак.

Җыенның төп өлеше - тәүбә кылу - Болгар шәһәрчегендәге Кече манараянында узачак. Аны Россия мөселманнарының Үзәк Диния нәзарәте рәисе Тәлгать хәзрәт Таҗетдин алып барачак. 

Чарада Татарстан Мөфтие Камил хәзрәт Сәмигуллин, республиканың мөхтәсибләре һәм имамнары, «Россия – Ислам дөньясы: KazanForum» халыкара икътисади форумы вәкилләре, Бөтенроссия татар дин әһелләре форумы катнашучылары, шәкертләр һәм барлык теләүчеләр катнашачак.

Изге Болгар җыенының кульминацион вакыйгасы – тарихи Болгар Хан мәчетендә җәмәгать белән намаз уку булачак.

Моннан тыш, җыен кысаларында мәдәни чаралар, интерактив һәм тематик мәйданчыклар эшләячәк.