«Әйдә, ШаяРТ!» татар КВН лигасының 2024 ел сезоны җиңүчесенә 200 мең сум тапшыралачак

17 декабрь 17.00 сәгатьтә «Сәйдәш» мәдәният үзәгендә «Әйдә, ШаяРТ!» татар КВН лигасы финалы узачак.

Финалда барлыгы 5 команда катнаша. Җиңүче исеменә «Нәмәкәй» (Актаныш), «Сабалета» (Саба), «Изи» (Мамадыш), «Дилүс улы» (Казан), «Керәшеннәр»(Казан) командалары дәгъва кыла. Алар барысы да, ярымфиналда җиңеп, финалга чыккан.

Төп бүләк — 200 мең сум акча. 

Уенчыларга Россиянең атказанган, Татарстанның халык артисты Салават Фәтхетдинов, Татарстанның халык артисты Җәвит Шакиров, «ТНВ» телеканалының генераль директоры Илшат Әминов, «Әйдә,ШаяРТ!» татар КВН лигасы җитәкчесе Рамил Агдеев, «ТНВ» телеканалының алып баручысы Айваз Садыйров бәя бирәчәк.

Фото: «Әйдә, ШаяРТ!» матбугат хезмәте