“Миләшкәй” һәм “Кояшкай” арасында дуслык җиңде

Казанның 183 балалар бакчасында "Аулак өй - көрәш" төбәкара проектының чираттагы ярышлары узды. Ул 4 уеннан торган интеллектуаль ярыштан торды. “Йөзек салыш” уенында зирәклек соралса, “Йола күрсәтү” биреме катнашучының сәләтен ачты, сәнгатькә кызыксыну, мәхәббәт уятты. Ә инде әкиятләр, балаларны һәм әти-әниләрне сихри дөньяга алып керде. Кисәкләрдән торган әкиятләр рәсемен җыеп, әкиятләрнең эчтәлеге сөйләнде. Башкарылган һәр этап конфетлар белән бәяләнде. Нәтиҗәдә балалар командасы “Миләшкәй” һәм “Кояшкай” арасында дуслык җиңде.

- Гореф-гадәтләребез, йолаларыбыз аша элек-электән балага, хезмәткә мәхәббәт, өлкәннәргә хөрмәт белән караш, ипи белән җирне зурлау кебек хисләр тәрбияләнгән. Без дә бу горур гадәтләребезне онытмыйбыз, киләчәгебезне алдан кайгыртып, гореф гадәтләрне саклап калсак иде дигән теләктә калабаз. Мондый проектлар булганда, киләчәгебез дәвам итәр дип өметләнәбез, – ди 183 балалар бакчасы тәрбиячесе Рузилә Абдуллина. 

Әлеге проектның максаты “Татарстан Республикасы Дәүләт телләрен һәм Татарстан Республикасында башка телләрне саклау, өйрәнү һәм үстерү” Дәүләт программасын гамәлгә ашыру, балаларны әдәбиятка, сәнгатькә, халкыбызның гореф – гадәтләренә карата кызыксыну уяту, әдәби иҗатка сәләте булган яшьләрне ачыклау.